რუსულმა ჰაკერულმა ჯგუფმა რუმინეთის საპრეზიდენტო არჩევნების დღეს რუმინეთის მთავრობისა და პრეზიდენტობის რამდენიმე კანდიდატის ვებგვერდებზე შეტევა განახორციელა, - ინფორმაციას Politico ადგილობრივ მედიაზე დაყრდნობით ავრცელებს.
მათივე ინფორმაციით, DDOSIA/NoName057-ის სახელით ცნობილი ჯგუფის მიერ შეტევა განხორციელდა რუმინეთის საკონსტიტუციო სასამართლოს ვებსაიტზე, მთავრობის მთავარ პორტალზე, რუმინეთის საგარეო საქმეთა სამინისტროსა და პრეზიდენტობის ოთხი კანდიდატის ვებგვერდებზე.
რუმინეთის კიბერუსაფრთხოების ეროვნული დირექტორატის სიის თანახმად, მმართველი კოალიციის კანდიდატი, კრინ ანტონესკუ და ბუქარესტის მერი, ნიკუშორ დანი პრეზიდენტობის იმ კანდიდატებს შორის იყვნენ, რომლებიც თავდასხმის სამიზნე გახდნენ. უწყების ცნობით, ვებგვერდებმა მუშაობა განაახლეს.
კიბერშეტევაზე პასუხისმგებლობის აღების შესახებ განცხადება ჰაკერებმა „ტელეგრამ“ არხზე გაავრცელეს და სამიზნეებს შორის შინაგან საქმეთა და იუსტიციის სამინისტროების ვებგვერდები დაასახელეს.
ცნობისთვის, რუმინეთში საპრეზიდენტო არჩევნების პირველი ტური გუშინ ჩატარდა, რომელშიც გამარჯვება ნაციონალისტმა კანდიდატმა, რუმინელთა გაერთიანების ალიანსის“ (AUR) ლიდერმა, ჯორჯ სიმიონმა დაახლოებით 41%-ით მოიპოვა, მეორე ადგილზე კი ბუქარესტის მერი ნიკუშორ დანი გავიდა. არჩევნების მეორე ტური 18 მაისს გაიმართება.