გლდანი, მე-8 დაწესებულება, - ასე უპასუხა იუმორისტმა ონისე ცხადაძემ თბილისის სააპელაციო სასამართლოს მოსამართლე თეა ლეონიძეს კითხვაზე, ეთქვა მისი ფაქტობრივი საცხოვრებელი.
ცხადაძის პასუხის შემდეგ, მოსამართლემ მას დაუკონკრეტა, რომ ამჟამინდელი სამყოფელი არ უკითხავს და დაკავებამდე საცხოვრებლის მისამართი ეთქვა.
„დაკავებამდე არ მახსოვს, ისე ვაგნებდი“, - განაცხადა ცხადაძემ.
იქამდე კი როცა მოსამართლემ მიერ მისი სახელი და გვარი ამოიკითხა - „ონისე ცხადაძე“, მან უპასუხა - „ვარ!“
ამ წუთებში თბილისის სააპელაციო სასამართლოში მსახიობ ანდრო ჭიჭინაძის, იუმორისტ ონისე ცხადაძისა და კიდევ 9 მსჯავრდებული პირის სასამართლო პროცესი მიმდინარეობს.
ცნობისთვის, თბილისის საქალაქო სასამართლომ ორგანიზებულ ჯგუფურ ძალადობაში მონაწილეობის ბრალდებით დაკავებული 11 პირი - ანდრო ჭიჭინაძე, ონისე ცხადაძე, ჯანო არჩაია, რუსლან სივაკოვი, ლუკა ჯაბუა, გურამ მირცხულავა, ვალერი თეთრაშვილი, გიორგი ტერიშვილი, ირაკლი ქერაშვილი, რევაზ კიკნაძე და სერგეი კუხარჩუკი აღნიშნულ ბრალდებაში უდანაშაულოდ ცნო, თუმცა, ბრალდებას კვალიფიკაცია შეუცვალა - ისინი ჯგუფურ ქმედებაში მონაწილეობისთვის ცნო დამნაშავედ.მოსამართლე ნინო გალუსტაშვილმა თითოეულ ბრალდებულს 2 წლით თავისუფლების აღკვეთა მიუსაჯა.დაკავებულ 11 პირს ბრალდება სისხლის სამართლის კოდექსის 225-ე მუხლის მეორე ნაწილით ჰქონდათ წარდგენილი, რაც ორგანიზებულ ჯგუფურ ძალადობაში მონაწილეობას გულისხმობს, რაც სასჯელის სახედ და ზომად 4-დან 6-წლამდე ვადით თავისუფლების აღკვეთა ითვალისწინებს. მოსამართლე გალუსტაშვილმა აღნიშნული ბრალდება სისხლის სამართლის კოდექსის 226-ე მუხლზე გადააკვალიფიცირა, რაც ჯგუფურ მოქმედებაში აქტიურ მონაწილეობას გულისხმობს, რამაც საზოგადოებრივი წესრიგი დაარღვია.პროკურატურა მსჯავრდებულების დამნაშავედ ცნობას თავდაპირველად წარდგენილი მუხლით ითხოვს, დაცვის მხარე კი საერთოდ გამამართლებელი განაჩენის გამოტანას.