15 იანვარს გერმანიის საელჩოში შევხვდი „საქართველოს ახალგაზრდულ გაერთიანებას“ და ფოტო გამოვაქვეყნე. დღეს, „იმედი“ და „რუსთავი 2“ აცხადებენ, რომ შეხვედრა „ფარული“ იყო და „ირანის რადიკალური სცენარის“ წახალისება მოხდა. ეს სრული სიცრუეა. მსგავსი არაფრის განხილვა მომხდარა. გერმანიის სახელით ამ აგრესიულ დეზინფორმაციას უარვყოფ, - ამის შესახებ გერმანიის ელჩი საქართველოში, პეტერ ფიშერი სოციალურ ქსელში წერს.
მისი თქმით, საუბარი იყო „ახალგაზრდების შეშფოთებაზე იმასთან დაკავშირებით, რომ საქართველოს ევროკავშირისკენ გზა დაბლოკილია“.
„ვისაუბრეთ ახალგაზრდების შეშფოთებაზე განათლების რეფორმის, ღრმად პოლარიზებული გარემოს შესახებ, სადაც განსხვავებულ აზრს ღალატად აცხადებენ, რეალურად კი ეს დემოკრატიის არსს წარმოადგენს. კარგი მომავლისთვის ყველა ახალგაზრდა გვჭირდება“, - წერს ფიშერი X-ზე.
ცნობისთვის, „იმედმა“ და „რუსთავი 2"-მა გაავრცელეს ინფორმაცია, რომ 15 იანვარს გერმანიის საელჩოში, ელჩ პეტერ ფიშერთან შეხვედრა გამართეს „რადიკალური ოპოზიციის სხვადასხვა დაჯგუფების წევრებმა“.
„არსებული ინფორმაციით, პეტერ ფიშერი ოპოზიციის აქტივისტებს პროცესების რადიკალიზაციის აუცილებლობაზე ესაუბრა და მათ განუმარტა, რომ მსხვერპლის არსებობა გამოიწვევს მასობრივ და რადიკალურ პროტესტს, მაგალითად კი ირანში არსებული ვითარება მოიყვანა“, - ნათქვამია „იმედისა“ და „რუსთავი 2“-ის მიერ გავრცელებულ ინფორმაციაში.