ირანის ხელისუფლებამ დაადასტურა, რომ ირანში გამართული საპროტესტო აქციების დროს სულ მცირე 5 000 ადამიანი დაიღუპა, - ამის შესახებ ირანელმა ოფიციალურმა პირმა Reuters-ს განუცხადა.
მისი ინფორმაციით, დაღუპულებს შორის უსაფრთხოების სამსახურის 500 თანამშრომელია.
სახელმწიფო პირმა, რომელმაც საკითხის მგრძნობელობის გამო ვინაობის გამხელა არ ისურვა, Reuters-ს ასევე განუცხადა, რომ ყველაზე მძიმე შეტაკებები და დაღუპულთა ყველაზე მაღალი რაოდენობა ირანის ჩრდილო-დასავლეთით მდებარე ირანელი ქურთების რაიონებში მოხდა.
„დაღუპულების საბოლოო მაჩვენებლის მკვეთრი ზრდა მოსალოდნელი არ არის“, -განაცხადა ოფიციალურმა პირმა და დასძინა, რომ „ისრაელმა და საზღვარგარეთ შეიარაღებულმა დაჯგუფებებმა“ ქუჩებში გამოსულებს მხარი დაუჭირეს და აღჭურვეს.
ცნობისთვის, აშშ-ში დაფუძნებულმა უფლებადამცველმა ჯგუფმა - „ადამიანის უფლებათა დამცველი აქტივისტები ირანში“ - გუშინ განაცხადა, რომ დაღუპულთა რიცხვმა 3 308-ს მიაღწია, ხოლო კიდევ 4 382 შემთხვევას კი ჯერ კიდევ იკვლევენ. ჯგუფის ინფორმაციით, საპროტესტო აქციების დროს 24 000-ზე მეტი ადამიანი დააპატიმრეს.