„ერთიანი ნაციონალური მოძრაობა“ აქტიურად ვმუშაობთ ევროპელ პარტნიორებთან, რომ ქართველ ხალხს უვიზო მიმოსვლა არ შეუჩერდეს და მონაპოვარი, რომელიც მის უდიდებულესობა ქართველ ერს ეკუთვნის, არ დაიკარგოს - ბინძური ტყუილია, რომ ევროპა ამას შანტაჟისთვის იყენებს, პირიქით, ისინი აშანტაჟებენ ევროპას, მათ შორის ქართველი ხალხის ავტორიტარიზმში ცხოვრებით და დიქტატურული ნაბიჯების გადადგმით, რის შედეგსაც ისინი იმკიან,- ამის შესახებ „ერთიანი ნაციონალური მოძრაობის“ ერთ-ერთმა ლიდერმა ლევან სანიკიძემ განაცხადა, რითაც გამოეხმაურა ევროკომისიის მიერ ქართული დიპლომატიური პასპორტის მფლობელებისთვის უვიზო რეჟიმის შეჩერებას.
სანიკიძის თქმით, აღნიშნული სანქცია ევროკავშირის მხრიდან ადეკვატური ნაბიჯია.
„ჩვენ აქტიურად ვმუშაობთ ჩვენს ევროპელ პარტნიორებთან, რათა ეს გადაწყვეტილება არ გავრცელდეს საქართველოს მოქალაქეებზე იმიტომ, რომ ქართველი ხალხი იმსახურებს ევროპაში უვიზო მიმოსვლას. ეს არის ჩვენი საერთო მონაპოვარი. რაც შეეხება სანქციებს, რომელიც დაუწესდათ „ქართული ოცნების“ რეჟიმის კონკრეტულ წარმომადგენლებს, არის ძალიან გასაგები, ადეკვატური ნაბიჯი ევროკავშირის მხრიდან, მარტივი მიზეზის გამო: წესები, რომლითაც „ქართული ოცნება“ თამაშობს საქართველოში და როგორც ექცევა ქართველ ხალხს, არის აბსოლუტურად მიუღებელი ევროკავშირის სახელმწიფოებისა და მათი ლიდერებისთვის“,- განაცხადა ლევან სანიკიძემ.