ევროკავშირის წევრი სახელმწიფოები ბელარუსის წინააღმდეგ ახალი სანქციების დაწესებაზე შეთანხმდნენ, - ამის შესახებ ინფორმაციას მედიასაშუალებები დიპლომატიურ წყაროებზე დაყრდნობით ავრცელებენ.
მათივე ცნობით, სანქციები, რომელიც Ryanair-ის თვითმფრინავის ინციდენტს უკავშირდება, ევროკავშირის ელჩებმა ოთხშაბათს დაამტკიცეს, საგარეო მინისტრები კი მას, სავარაუდოდ, მომავალ კვირაში მიიღებენ. გავრცელებული ინფორმაციით, ახალი სანქციების სამიზნე ბელარუსის საავიაციო სექტორთან დაკავშირებული მინიმუმ 7 პირია.
შეგახსენებთ, ბლოკის „შავ სიაში“ უკვე შესულია 88 პირი, მათ შორის ბელარუსის პრეზიდენტი ალექსანდრე ლუკაშენკო და მისი ვაჟი. ბელარუსში ჩატარებული საპრეზიდენტო არჩევნების შესახებ, რომელშიც, ოფიციალური მონაცემებით, ალექსანდრე ლუკაშენკომ დიდი უპირატესობით გაიმარჯვა, ქვეყნის ოპოზიცია და დასავლეთი აცხადებს, რომ „არც თავისუფალი იყო და არც სამართლიანი“.
ამასთან, ლუკაშენკოს რეჟიმმა საერთაშორისი კრიტიკა 23 მაისს მომხდარი ინციდენტის გამოც დაიმსახურა, როდესაც Ryanair-ის თვითმფრინავი, რომელიც ათენი-ვილნიუსის რეისს ასრულებდა, მინსკში იძულებით დასვეს და ბორტზე მყოფი ოპოზიციურად მოაზროვნე ჟურნალისტი რომან პროტასევიჩი და მისი მეგობარი გოგონა დააკავეს.