მეანაბრეები კიდევ ერთი საფინანსო კომპანიის თაღლითობის მსხვერპლი გახდნენ. საფინანსო კომპანია ემეფიქს ბროკერ ჯორჯიას დაზარალებულებს კუთვნილი პროცენტი უკვე ორი თვეა არ მიუღიათ. კომპანიის თბილისის ფილიალი დაკეტილია. მეანაბრეების ინფორმაციით, ემეფიქს ბროკერ ჯორჯიას 100%-იანი წილის მფლობელმა და ოფიციალურმა წარმომადგენელმა მარგაკრიტა ჟიზნევსკაიამ საქართველო უკვე დატოვა. მეანაბრეების ნაწილი იმედოვნებს, რომ პრობლემა დროებითია.
მეანაბრეების უფლებათა დამცველის ინფორმაციით, საკითხზე სამართლებრივი დავა უკვე დაწყებულია. კახა მაღრაძის განმარტებით, შესაბამისი განცხადებით მან უკვე მიმართა საქართველოს მთავარ პროკურატურასა და ფინანსთა სამინისტროს საგამოძიებო სამსახურს.