ყველასათვის ნათელია, რომ სამყარო სულ უფრო მეტად ციფრული ხდება, ჩვენ კი სულ უფრო ნაკლებად ვაქცევთ ყურადღებას იმას, როგორ იცვლება ჩვენი ყოფა. არა და სულ უფრო მეტი ადამიანი უჩივის უძილობას, ძილის დარღვევებს, თავის ტკივილს, სისუსტეს, დაღლილობის შეგრძნებას და სხვა უსიამოვნებებს, რომლებიც მობილურ და კომპიუტერულ მოწყობილობებს უკავშირდება. ზოგს ეცინება, მაგრამ ფაქტია, რომ ცისფერი გამოსხივება მნიშვნელოვნად აისახება ბიოლოგიური რიტმების ცვლილებებზე და, რაც მთავარია, ნეგატიურ გავლენას ახდენს ჩვენი ჯანმრთელობის სხვადასხვა ასპექტზე. არაერთი კვლევითაა დადასტურებული, რომ მობილური და კომპიუტერული მოწყობილობებიდან მომავალი ცისფერი სინათლის ხანგრძლივად ზემოქმედება იწვევს ძილის დარღვევას და თვალების დაზიანებას. მეცნიერებმა გამოაქვეყნეს ახალი კვლევის შედეგები, რომელიც მიეძღვნა ტელეფონებისა და “ნოუთბუქების” ეკრანთა ცისფერ გამოსხივებას. როგორც გაირკვა, ამ სინათლეს ხანგრძლივად ზემოქმედებას შეუძლია თავის ტვინის უჯრედების დაზიანება და სიცოცხლის ხანგრძლივობის შემოკლება.