თბილისში ახალგაზრდა მამაკაცის მკვლელობის საქმეზე პოლიციამ ორი პირი დააკავა. შინაგან საქმეთა სამინისტროს ინფორმაციით, მათ ჯგუფურად ჩადენილ განზრახ მკვლელობას ედავებიან.
გამოძიების მიხედვით, დაპირისპირება ყოფით ნიადაგზე დაიწყო და ურთიერთშელაპარაკება ფიზიკურ ანგარიშსწორებაში გადაიზარდა. ბრალდებულებმა მამაკაცს ცივი იარაღით მრავლობითი ჭრილობა მიაყენეს, შემდეგ კი შემთხვევის ადგილიდან მიიმალნენ. მიღებული დაზიანებების შედეგად ახალგაზრდა ადგილზე გარდაიცვალა.
შსს-ს განცხადებით, სამართალდამცველებმა ჩატარებული ოპერატიული ღონისძიებებისა და საგამოძიებო მოქმედებების შედეგად ორივე პირი ბრალდებულის სახით დააკავეს.
საქმეზე გამოძიება სისხლის სამართლის კოდექსის 109-ე მუხლის „ი“ ქვეპუნქტით მიმდინარეობს, რაც დამამძიმებელ გარემოებაში ჯგუფურად ჩადენილ განზრახ მკვლელობას გულისხმობს. აღნიშნული დანაშაული 20 წლამდე ან უვადო თავისუფლების აღკვეთას ითვალისწინებს.