9 მაისის განმავლობაში, როდესაც უკრაინასა და რუსეთს შორის „ცეცხლის შეწყვეტის“ შეთანხმება მოქმედებდა, საოკუპაციო ძალების მიერ განხორციელებული დაბომბვის შედეგად დონეცკის, ხარკოვისა და ხერსონის ოლქებში 19 ადამიანი დაიჭრა, - ინფორმაციას უკრაინული მედია ავრცელებს.
გავრცელებული ინფორმაციით, 9 მაისს, რუსეთის ძალების მიერ გახსნილი ცეცხლის შედეგად დონეცკის ოლქის ოთხი მცხოვრები დაიჭრა.
ამასთან, ხარკოვის ოლქში დაბომბვის შედეგად რვა ადამიანი დაშავდა, მათ შორის ორი ბავშვი. შვიდი ადამიანი, მათ შორის ერთი ბავშვი, დაშავდა ხერსონის ოლქში.
რუსულმა ძალებმა კრიტიკული და სოციალური ინფრასტრუქტურა დაბომბეს, დააზიანეს მრავალსართულიანი შენობა და რვა კერძო სახლი.
შეგახსენებთ, აშშ-ის პრეზიდენტმა დონალდ ტრამპმა 8 მაისს სოციალურ ქსელში დაწერა, რომ რუსეთსა და უკრაინას შორის ომში 9, 10 და 11 მაისს სამდღიანი ცეცხლის შეწყვეტა იქნებოდა.