დიუშენის კუნთოვანი დისტროფიის მქონე პაციენტების მხარდასაჭერად თითქმის 190 ექიმი ხელისუფლებას მიმართავს და იშვიათი დაავადებების მართვის მკაფიო პოლიტიკის შემუშავებას ითხოვს. ხელმომწერები აცხადებენ, რომ პაციენტებს ღირსეული კომუნიკაცია და თანამედროვე მკურნალობაზე ხელმისაწვდომობა სჭირდებათ.
ექიმების შეფასებით, იშვიათი დაავადებების მქონე პაციენტები საქართველოში ხშირად სისტემური მხარდაჭერის გარეშე რჩებიან და სასიცოცხლოდ აუცილებელი მედიკამენტების მოთხოვნით პროტესტის უკიდურეს ფორმებს მიმართავენ.
უკვე 25 დღეა, დიუშენის დიაგნოზის მქონე ბავშვების მშობლები მთავრობის ადმინისტრაციასთან ღამეს ღია ცის ქვეშ ათევენ. ისინი რამდენიმე პრეპარატისა და თერაპიის ქვეყანაში შემოტანას წელიწად-ნახევარია ითხოვენ. აღნიშნული მედიკამენტები FDA-სა და EMA-ს მიერაა ავტორიზებული და სხვადასხვა ქვეყანაში კონტროლის პირობებში გამოიყენება. ჯანდაცვის სამინისტროში აცხადებენ, რომ პრეპარატების უსაფრთხოებასა და ეფექტიანობასთან დაკავშირებით კვლევები ჯერ დასრულებული არ არის.