შეიძლება ჩვენი ქვეყნის უსაფრთხოება დადგეს კითხვის ნიშნის ქვეშ, შესაბამისად, სადაც ამის რისკი არსებობს, ჩვენ ვართ მოწოდების სიმაღლეზე. არ დასრულებულა უკრაინასა და რუსეთს შორის ომი და ვინმეს თუ ჰგონია, რომ ეს საფრთხე საქართველოსთან მიმართებით არ არის, ძალიან შემცდარა,- ამის შესახებ ქართული ოცნების“ დეპუტატმა ირაკლი ჭეიშვილმა უკრაინის წინააღმდეგ აგრესიის დანაშაულის გამოძიებისთვის სპეციალური ტრიბუნალის შექმნის შესახებ ახალი გაფართოებული ნაწილობრივი შეთანხმების შესახებ განაცხადა, რომელთან შეერთების განზრახვა 36-მა ქვეყანამ და ევროკავშირმა გამოთქვეს.
ჭეიშვილის თქმით, საქართველო ამ დრომდე არაერთ რეზოლუციას შეერთებია, მაგრამ „როდესაც რეზოლუცია არის ქვეყნის სუვერენიტეტისთვის საფრთხის შემცველი, ხელისუფლება მასთან შეერთებისგან ყოველთვის თავს შეიკავებს“.
„ჩვენ არაერთ რეზოლუციას შევუერთდით გაეროში თუ ევროსაბჭოში თუ სხვა მაღალი დონის პლატფორმაზე. ჩვენ ამოვდივართ ქართველი ხალხისა და საქართველოს ინტერესებიდან და ასე ვმოქმედებთ, სადაც ჩვენი ქვეყნის სუვერენიტეტს, ქართველ ხალხს, მშვიდობას შეიძლება რაიმე დოზით პრობლემა ან საფრთხე შეექმნას. ძალიან ბევრი საფრთხე შეიძლება იყოს, ამის რისკი არსებობს, შესაბამისად, იმიტომ იქნა ეს გადაწყვეტილება მიღებული და რეზოლუციისთვის მხარის არ დაჭერა. არსებობს რეალური საფრთხეები, წლების განმავლობაში არსებობს ეს საფრთხეები საქართველოსთან მიმართებით. როდესაც რუსეთ-უკრაინის ომი დაიწყო, არაერთი რეზოლუცია იქნა მიღებული, რომელსაც ჩვენ მხარი დავუჭირეთ, ჩვენ ვაღიარებთ და მხარს ვუჭერთ უკრაინის მთლიანობას, სუვერენიტეტს, უკრაინელ ხალხს და ზოგადად არაერთი ქმედითი ნაბიჯიც გადავდგით მათ დასახმარებლად, საპირისპიროდ რაც მივიღეთ, ყველამ კარგად ვიცით. აქედან გამომდინარე, ის, რომ კონკრეტულ საფრთხეს შეიძლება შეიცავდეს მსგავსი რეზოლუციები და მსგავსი სანქციები, ამიტომ ვმოქმედებთ ჩვენ ამგვარად. ჩვენი ქვეყნის უსაფრთხოებაზე ვსაუბრობთ. შეიძლება ჩვენი ქვეყნის უსაფრთხოება დადგეს კითხვითი ნიშნის ქვეშ, შესაბამისად, სადაც ამის რისკი არსებობს, ჩვენ ვართ მოწოდების სიმაღლეზე. არ დასრულებულა უკრაინასა და რუსეთს შორის ომი და ვინმეს თუ ჰგონია, რომ ეს საფრთხე საქართველოსთან მიმართებით არ არის, ძალიან შემცდარა“, - განაცხადა ჭეიშვილმა.
ცნობისთვის, 15 მაისს მოლდოვაში გამართულ ევროპის საბჭოს 46 წევრი ქვეყნის საგარეო საქმეთა მინისტრების შეხვედრაზე, 36-მა ქვეყანამ და ევროკავშირმა გამოთქვეს განზრახვა, შეუერთდნენ უკრაინის წინააღმდეგ აგრესიის დანაშაულის გამოძიებისთვის სპეციალური ტრიბუნალის შექმნის შესახებ ახალ გაფართოებულ ნაწილობრივ შეთანხმებას.
მასში მონაწილეობის სურვილი გამოთქვეს ევროპის საბჭოს ოცდათოთხმეტმა წევრმა სახელმწიფომ (ანდორა, ავსტრია, ბელგია, ხორვატია, კვიპროსი, ჩეხეთი, დანია, ესტონეთი, ფინეთი, საფრანგეთი, გერმანია, საბერძნეთი, ისლანდია, ირლანდია, იტალია, ლატვია, ლიხტენშტაინი, ლიეტუვა, ლუქსემბურგი, მოლდოვას რესპუბლიკა, მონაკო, მონტენეგრო, ნიდერლანდები, ნორვეგია, პოლონეთი, პორტუგალია, რუმინეთი, სან-მარინო, სლოვენია, ესპანეთი, შვედეთი, შვეიცარია, უკრაინა, გაერთიანებული სამეფო), ასევე, ევროკავშირმა, ავსტრალიამ და კოსტა-რიკამ.
საქართველოს საგარეო საქმეთა მინისტრმა მაკა ბოჭორიშვილმა განმარტა, რატომ არ შეუერთდა საქართველო უკრაინის წინააღმდეგ აგრესიის დანაშაულის გამოძიებისთვის სპეციალური ტრიბუნალის შექმნის შესახებ შეთანხმებას და განაცხადა, ევროკავშირის ზოგიერთი წევრი ქვეყნის დამოკიდებულება საქართველოს მიმართ, არ იძლევა შესაძლებლობას, მიიღონ ისეთი გადაწყვეტილები, რომლებიც „საქართველოს დამატებით რისკებსა და საფრთხეებს შეუქმნის“.