საფრანგეთში, მას შემდეგ, რაც „პარი სენ-ჟერმენმა“ (პსჟ) ჩემპიონთა ლიგის ფინალში „არსენალი“ დაამარცხა, ფეხბურთის გულშემატკივრებსა და პოლიციას შორის შეტაკებების შედეგად 219 ადამიანი დაშავდა. ინფორმაციას BBC-ი ავრცელებს.
გამოცემის ცნობით, საფრანგეთის შინაგან საქმეთა მინისტრმა ლორან ნუნიესმა განაცხადა, რომ დაშავებულებიდან რვა მძიმე მდგომარეობაშია. მისივე თქმით, ძალადობის გამო 780 ადამიანი დააკავეს.
ამასთან, პარიზის წრიულ გზაზე მომხდარი ავარიის შემდეგ, რომლის გადაკეტვაც ღამით აქციის მონაწილეებმა სცადეს, ერთი ადამიანი გარდაცვლილი იპოვეს.
დედაქალაქ პარიზში არეულობის შესაჩერებლად ათასობით პოლიციელი იყო მობილიზებული.
გავრცელებულ კადრებში ჩანს, როგორ აფეთქებენ პიროტექნიკას, ამსხვრევენ მაღაზიის ვიტრინას და წვავენ ელექტროველოსიპედებს.
ასევე, ცნობილია, რომ დღეს ფეხბურთელები გამარჯვების აღლუმში მიიღებენ მონაწილეობას. აღლუმი მოიცავს ეიფელის კოშკის გვერდით მდებარე მარსის ველის პარკის დათვალიერებას და საფრანგეთის პრეზიდენტის, ემანუელ მაკრონის მიერ გამართულ მიღებას.