„ერთიანი ნაციონალური მოძრაობის“ ერთ-ერთი ლიდერის ვასო ურუშაძის განცხადებით, კატეგორიულად მოითხოვენ, შემცირდეს პარკირებასთან დაკავშირებული ჯარიმები.
როგორც ვასო ურუშაძემ დღევანდელ ბრიფინგზე განაცხადა, ჯარიმებს არანაირი კავშირში არ აქვს საგზაო მოძრაობის უსაფრთხოებასთან და ის თბილისის მერმა, კახა კალაძემ თითოეულ მოქალაქეს „ხარკად დააკისრა“.
„ქართული ოცნების“ უპასუხისმგებლო პოლიტიკის შედეგად, ბოლო 14 წლის განმავლობაში, საქართველოში 14 ათასი ადამიანი გარდაიცვალა ავტოსაგზაო შემთხვევების შედეგად. სამწუხაროდ, მათი უმრავლესობა ახალგაზრდები და ბავშვები იყვნენ. ეს ყველაფერი განაპირობა იმ გულგრილმა და უპასუხისმგებლო პოლიტიკამ, რომელსაც „ქართული ოცნება“ ბოლო 14 წლის განმავლობაში ატარებს, განსაკუთრებით საგზაო მოძრაობის უსაფრთხოების ნაწილში. ერთადერთი ინტერესები ამ წლების განმავლობაში, რაც ქართულ ოცნებას“ ჰქონდა, ეს იყო ჯარიმების გაზრდა და რაც შეიძლება მეტი ფულის ამოღება ჩვენი ქვეყნის მოქალაქეებიდან, მძღოლებიდან. მათ არ აინტერესებდათ სტატისტიკური მაჩვენებლები, როცა წლიდან წლამდე იზრდებოდა ჯარიმების რაოდენობა, საბიუჯეტო შემოსავალი ჯარიმებიდან და ამავდროულად, იზრდებოდა ავტოსაგზაო შემთხვევების რაოდენობა, სიკვდილიანობა საქართველოს საავტომობილო გზებზე. ჩვენ კატეგორიულად ვითხოვდით და დღესაც მოვითხოვთ, შემცირდეს ის ჯარიმები, რომელიც არანაირ კავშირში არ არის საგზაო მოძრაობის უსაფრთხოებასთან, ასეთი არის პარკირება. განსაკუთრებით თბილისსა და ბათუმში, რომელიც კახა კალაძემ ხარკად დააკისრა თითოეულ მოქალაქეს. ფაქტობრივად, დღე არ აგავა, რომ მძღოლი არ დააჯარიმონ. 1100 ჯარიმა თბილისში მხოლოდ ერთ დღეში იწერება არასწორი პარკირებისთვის, ამას აკეთებს კახა კალაძე, რომელიც არც ინფრასტრუქტურას ავითარებს, არც საგზაო მოძრაობა აინტერესებს, მხოლოდ ჯარიმები აინტერესებს. დღეს „ქართული ოცნების“ მხრიდან მანიპულაციურად საუბარი, რომ ჯარიმები თურმე დიდი ტვირთი ყოფილა ჩვენი ქვეყნის მოქალაქეებისთვის და აძვირებს მათ ცხოვრებას, არის კიდევ ერთი ფარსი, კიდევ ერთი დიდი ტყუილი“,-განაცხადა ურუშაძემ.