პროკურატურამ ჯგუფურად უკანონო სამეწარმეო საქმიანობის, უკანონო შემოსავლის ლეგალიზაციისა და სამსახურებრივი უფლებამოსილების ბოროტად გამოყენების ფაქტებზე სისხლისსამართლებრივი დევნა 55 პირის, მათ შორის 24 იურიდიული პირის მიმართ დაიწყო. გამოძიებით დადგინდა, რომ 2018-2025 წლებში, ჯგუფის წევრებმა დააფუძნეს ათეულობით კომპანია, რომლებმაც ავტორიზებული სააფთიაქო საქმიანობის ნებართვა მიიღეს, რის შემდგომაც საქართველოში იმპორტირებული ფსიქოტროპული მედიკამენტების ფიქტიური გადაყიდვა დასახელებულ ავტორიზებულ აფთიაქებზე განხორციელდა. დანაშაულებრივი საქმიანობის შედეგად, ყოველგვარი რეგულაციისა და სანებართვო პირობების უხეში დარღვევით სამოქალაქო ბრუნვაში შევიდა სპეციალურ კონტროლს დაქვემდებარებული ჯამში 56 მილიონ ერთეულ აბზე მეტი ფსიქოტროპული მედიკამენტი, რამაც რიგ შემთხვევებში ათასობით მოქალაქის ჯანმრთელობას სხვადასხვა სიმძიმის საფრთხე შეუქმნა.