როგორც ჩანს, ირაკლი კირცხალია აჟიტირებულია, ალბათ, ბედნიერად გრძნობს თავს მამუკა მდინარაძის კალთის ქვეშ, მაგრამ ერთი რამ უნდა იცოდნენ ირაკლი კირცხალიამაც და სხვებმაც, რომ ისინი ვერ დაიმალებიან მდინარაძის კალთის ქვეშ, სისტემის ზურგს უკან და აუცილებლად დადგება დრო, როცა მათ მოუწევთ პასუხისმგებლობის აღება მათ ნებისმიერ სიტყვასა და ქმედებაზე, - ამის შესახებ “გახარია საქართველოსთვის” წევრმა, პარლამენტის დეპუტატმა გიგა ფარულავამ ქართული ოცნების“ დეპუტატის განცხადებასთან დაკავშირებით განაცხადა, რომელიც „ქართული ოცნებისა“ და პარტია „გახარია -საქართველოსთვის“ წევრებს შორის პარლამენტში მომხდარი დაპირისპირების გამოძიებას ეხებოდა.
ფარულავას თქმით, საქართველოს პარლამენტში მომხდარი დაპირისპირება სისტემური დანაშაულის მორიგი გამოვლინება იყო.
“ჩვენ კიდევ ერთხელ, ხაზგასმით ვამბობთ, რომ ეს არის სისტემური დანაშაულის მორიგი გამოვლინება, რაც მოხდა პარლამენტში, შესაბამისად, სისტემამ, კონკრეტულმა პირებმა, ვინც ამაში მონაწილეობდნენ, ასევე პროკურატურამაც, უნდა იცოდნენ ერთი რამ, რომ აუცილებლად დადგება დრო, როდესაც ყველას თავისი ქმედებისთვის და ასევე უმოქმედობისთვის აუცილებლად მოუწევს პასუხისმგებლობის აღება.
რაც შეეხება ამ “ქარდებს”, ისინი გაზიარებული იყო გამომდინარე იქიდან, რაც სხვა პარლამენტში ხდებოდა ძალადობის ფაქტებთან დაკავშირებით. კიდევ ერთხელ ვამბობ, ეს კონკრეტული ფაქტი, რაც საქართველოს პარლამენტში მოხდა, არის სისტემური ძალადობის მორიგი გამოვლინება. ჩვენ აქ კონკრეტულ გვარებზე არ ვსაუბრობთ, ეს იყო ჩვენი გუნდის მიმართ “ქართული ოცნების” მიერ დაგეგმილი, ორგანიზებული და განხორციელებული სისტემური დანაშაული”, - განაცხადა გიგა ფარულავამ.
შეგახსენებთ, საპარლამენტო უმრავლესობის ლიდერმა ირაკლი კირცხალიამ მედიასთან, პარლამენტში „გახარიას პარტიის“ წარმომადგენლებთან მომხდარ ფიზიკურ დაპირისპირებაზე ასეთი კომენტარი გააკეთა: „სენეგალში, ერთ-ერთმა კოლეგამ ფეხმძიმე კოლეგას ჩაარტყა ფეხი, თუ ხელი. ბატონმა [გიგა] ფარულავამ წარმოადგინოს ცნობა ორსულობის შესახებ და პირობას ვაძლევ, მე თვითონ ვიშუამდგომლებ პროკურატურასთან, რომ ჩვენს წინააღმდეგ ამ ბრალდებასთან დაკავშირებით აღიძრას რაიმე საქმე - ერთი, ტრიბუნასთან არ უტირიათ, დანარჩენი ყველაფერი გააკეთეს“, - განაცხადა ირაკლი კირცხალიამ.