გერმანიაში საქართველოს ელჩი, ალექსანდრე კარტოზია 23 ივლისს პრეზიდენტ ფრანკ-ვალტერ შტაინმაიერს რწმუნებათა სიგელებს ოფიციალურად გადასცემს. კარტოზია ელჩად ჯერ კიდევ გასული წლის ოქტომბერში დაინიშნა, თუმცა აკრედიტაციის პროცესი ამ დრომდე გაჭიანურდა, რასაც საქართველოს ხელისუფლება არაერთხელ აკრიტიკებდა. მმართველ პარტიაში მიიჩნევენ, რომ ეს ნაბიჯი ორ ქვეყანას შორის ურთიერთობების გაუმჯობესებას ხელს შეუწყობს. ოპოზიციაში კი აცხადებენ, რომ აკრედიტაცია მხოლოდ დიპლომატიური პროცედურაა და ბერლინსა და თბილისს შორის არსებული პოლიტიკური უთანხმოების ავტომატურად მოგვარებას ვერ უზრუნველყოფს.