ირაკლი ღარიბაშვილი ხელისუფლებას პოლიტიკური დევნისა და ლაზარე ჯორბენაძის საქმეზე გამოძიების არაობიექტურად წარმართვის გამო აკრიტიკებს. ყოფილი პრემიერის განცხადებით, ხელისუფლებამ მისი წერილის შემდეგ მასთან დაკავშირებული ადამიანების დაკითხვა დაუყოვნებლივ დაიწყო, მაშინ როცა ამ საქმეზე კითხვების დამსმელი ჟურნალისტები და სხვა პირები, მისივე თქმით, თითქმის 5 თვის განმავლობაში არ გამოუკითხავთ. ღარიბაშვილი უარყოფს მის „ნაციონალურ მოძრაობასთან“, „დიფ-სტეიტთან“ ან უცხო ქვეყნების ინტერესებთან დაკავშირებას და აცხადებს, რომ მხოლოდ საქართველოს ემსახურება. მის განცხადებას წინ კობახიძის კრიტიკა უძღოდა. პრემიერი ღარიბაშვილის პოზიციას ყოფილი პრემიერის სტატუსისთვის შეუფერებელს უწოდებს. ოპოზიცია კი კობახიძისა და მამუკა მდინარაძის პროკურატურაში დაკითხვას ითხოვს.