უკრაინის შეიარაღებული ძალების გენერალური შტაბის განცხადებით, ღამით განხორციელებული დარტყმების შედეგად მოსკოვის ნავთობგადამამუშავებელი ქარხნის სამი ობიექტი დაზიანდა.
უწყების ცნობით, თავდაცვის ძალებმა ასევე დაარტყეს რუსეთის კუთვნილ საზენიტო-სარაკეტო კომპლექსს Buk-M3-ს, სარადარო სადგურ Nebo-U-ს და დრონების მწარმოებელ ობიექტს ოკუპირებულ ტერიტორიაზე.
გენშტაბის განმარტებით, თავდასხმის შედეგად დაზიანდა კაპოტნიას რაიონში მდებარე მოსკოვის ნავთობგადამამუშავებელი ქარხანა, რომლის ტერიტორიაზე მასშტაბური ხანძარი გაჩნდა. მოსკოვის ნავთობგადამამუშავებელი ქარხნის წლიური სიმძლავრე დაახლოებით 12 მილიონი ტონა ნავთობია. გენერალური შტაბის ინფორმაციით, ქარხანა რუსეთის არმიის მომარაგებაში მონაწილეობს.
გარდა ამისა, ზაპოროჟიეს ოლქში, უკრაინკას რაიონში, თავდაცვის ძალებმა გაანადგურეს რუსეთის კუთვნილი Buk-M3 ტიპის საზენიტო-სარაკეტო კომპლექსი, ხოლო დონეცკის ოლქში, ბალკასთან ახლოს Nebo-U რადარი.
ამასთან, ლუგანსკის ოლქის ოკუპირებულ სევერსკო-დონეცკის რაიონში ასევე განადგურდა რუსული უპილოტო საფრენი აპარატების წარმოების ობიექტი.