ჟენევაში საქართველოსა და რუსეთის კონფლიქტთან დაკავშირებული საერთაშორისო მოლაპარაკებების 68-ე რაუნდი დღეს იწყება და ორი დღე გაგრძელდება. შეხვედრის მთავარი საკითხები ოკუპირებულ ტერიტორიებზე უსაფრთხოებისა და ჰუმანიტარული ვითარება, 2008 წლის ცეცხლის შეწყვეტის შეთანხმების შესრულება, დევნილების დაბრუნება და გალში ინციდენტების პრევენციის მექანიზმის აღდგენაა. მმართველ გუნდში ჟენევის ფორმატს რუსეთთან კომუნიკაციის მნიშვნელოვან საერთაშორისო მექანიზმად მიიჩნევენ და მისი შენარჩუნების აუცილებლობაზე საუბრობენ. ოპოზიციაში კი აცხადებენ, რომ მოლაპარაკებები კონკრეტულ შედეგებს ვერ უზრუნველყოფს და ხელისუფლება რუსეთის პოლიტიკის საპასუხოდ საქართველოს ინტერესებს სათანადოდ ვერ იცავს.